如何與上司和老闆相處，一直都係職場中常見嘅難題。如果無法獲得佢哋嘅信任，除咗係公司嘅升遷發展會受阻外，對立嘅關係亦會令返工變成一件痛苦嘅事。
可能你一直渴望受到上司嘅喜愛同重視，但內心又唔想拉下尊嚴去刻意討好，或成為只遵從命令嘅魁儡。但其實，獲得上司信任又唔一定要做「擦鞋仔」嘅，只要跟住美國管理教練 Beth Armknecht Miller 同 Mark C Crowley 提出嘅「向上管理」建議，一樣都可以令你收獲上司嘅歡心。
-
定時回報工作 唔好出事先搵上司求救
定時向上司回報工作，一來能夠令上司了解自己嘅工作進度同狀況，二來當遇到小問題亦可以避免問題越滾越大。另外，當遇上問題時，可以提出幾個可行嘅解決方法一併回報給上司，避免上司覺得你零貢獻。
-
知己知彼
古語有云：「知己知彼，百戰百勝」，當你了解上司嘅工作目標，先會清楚知道自己有咩應該做，有咩唔應該做。咁樣就可以為上司提供更好嘅協助，而你愈了解佢嘅需求，就愈能夠被受重視。
-
了解上司嘅強弱項
了解上司嘅強項同弱項，就能夠係工作上互補長短。此外，學習佢的強項亦會幫助自己提升解決工作問題嘅能力。如此一來，就能夠同上司建立起互補嘅工作關係，而且亦會加強大家嘅合作。
-
上司都係「人」
上司同老闆其實同一般人一樣，都會有迷惘、脆弱、焦慮嘅時候，所以同理佢哋嘅「感受」，唔單止可以拉近大家嘅關係，同時亦令自己知道可以提供什麼幫助。