呢頭交完稅，轉頭又報稅？稅局每年5月第一個工作日就會向全港納稅人派「綠色炸彈」（報稅表），唔想下次稅季嚟到「揦手唔成勢」？打工仔女有冇諗過您都可以減輕呢個「炸彈」威力呢？政府推出嘅合資格延期年金（QDAP）、自願醫保（VHIS）同埋可扣稅強積金自願性供款（TVC）都能夠為大家提供稅務扣減優惠，小編今次會同大家講解坊間俗稱嘅「扣稅三寶」，包括扣稅形式、扣減上限、例子計算方法等攻略，仲有其他各種免稅額及扣稅項目，務求幫大家荷包慳上加慳！
報稅交稅時間表
當納稅人收到報稅表後，一般需要喺1個月內遞交報稅表，獨資業務人士嘅交表限期則為3個月。網上報稅可自動獲1個月延期。 按照以往稅局發出報稅表同交稅通知嘅時間，每年報稅交稅時間表為如下：
- 5-6月：陸續發出報稅表
- 6-7月：向稅局提交報稅表
- 10月：陸續發出交稅通知
- 1月：交第一期稅款
- 4月：交第二期稅款
延期年金是甚麼？
為咗應對人口老化問題，鼓勵市民盡早儲蓄迎接未來退休生活，香港政府推出咗「合資格延期年金保單」（Qualifying Deferred Annuity Policy ，簡稱：延期年金／QDAP）協助市民規劃退休。年金係用嚟規劃退休嘅工具，投保人將積累嘅儲蓄資產，轉化做喺特定時間內嘅穩定收入，目的係令市民更有規律使用退休積蓄，應對長壽所帶來嘅財務風險。年金都有唔同類型，只有「延期年金」先可以為大家扣稅。
延期年金特點
- 最低保費總額為$18萬，供款期最少5年
- 年金領取期最短為10年
- 投保人須年滿50歲或以上才可領取年金
- 保險公司須公開內部回報率及清楚列明年金收入的保證及非保證金額
- 附加保障如危疾及住院現金的保費，須與合資格延期年金的保費分開列明
「延期年金」適合仲有一定年期先至退休嘅打工仔，因為可以喺擁有穩定收入嘅時侯，透過定期儲蓄方式長時間累積退休資金，當打工仔去到某個退休年齡，就可以獲得年金入息，為自己「自製長糧」。另外，「延期年金」特設靈活年金期選擇，可以因應自身退休規劃時間表，選擇相對應年期的年金，例如您計劃65歲退休，預算人均壽命有90歲作計算，首5年有其他資產應付退休生活，你就可選擇年金領取期為20年的產品。假設您不幸離世，「延期年金」亦設身故賠償保障，至親或受益人可獲至少相等於已付保費100%的身故賠償。
延期年金扣稅扣幾多？
「延期年金」最大特點就係可以扣稅！納稅人可以就「延期年金」保費申請稅務扣除，扣除總額以每人每課稅年度HK$60,000為上限。
延期年金扣稅公式：延期年金扣稅額上限 x 稅率 = 扣稅金額
用而家薪俸稅∕個人入息課稅嘅稅率表中最高稅率（即17%）計算，最多可慳到HK$10,200稅款！
延期年金扣稅例子計算
單身人士：
| 每月入息 | HK$15,000
（每年收入HK$180,000） |
HK$20,000
（每年收入HK$240,000） |
HK$30,000
（每年收入HK$360,000） |
HK$60,000
（每年收入HK$720,000） |
| 原本應繳稅款 | HK$960 | HK$4,800 | HK$20,760 | HK$81,960 |
| 延期年金保費（10年年期） | HK$9,000 | HK$12,000 | HK$18,000 | HK$60,000 |
| 新應繳稅款 | HK$780 | HK$3,760 | HK$17,700 | HK$71,760 |
| 每年可節省稅款* | HK$180 | HK$1,040 | HK$3,060 | HK$10,200 |
已婚人士（配偶沒有工作、育有一名子女）：
| 每月入息 | HK$60,000
（每年收入HK$720,000） |
| 原本應繳稅款 | HK$37,420 |
| 延期年金保費（10年年期） | HK$60,000 |
| 新應繳稅款 | HK$27,220 |
| 每年可節省稅款* | HK$10,200 |
*假設只有基本免稅額、已婚人士免稅額、子女免稅額及強積金強制性供款稅務扣除的情況下，計算每年可節省稅款（以2023/24課税年度計算）。
如果夫婦二人都係納稅人嘅話，佢哋可以靈活調動「延期年金」保費，以盡享合共HK$120,000扣稅額，前提係每人申請扣除上限不可以超過HK$60,000。
收到稅表個陣，除咗個人基本免稅額之外，唔好唔記得仲可以因應家庭情況申請其他免稅額，例如已婚、子女供養、供養父母、兄弟姊妹、認可慈善捐款、個人進修開支、居所貸款利息等等，預先「夾清楚」各自填寫供養嘅人士，加加埋埋就會慳好多㗎！唔識計嘅，不妨用埋税局嘅「簡單税款計算機」，計下今個稅季交幾多稅喇！
如果買延期年金，有乜嘢要留意？
- 市面上嘅「延期年金」供款期一般都係5年或10年。如果你收入比較穩定，可以揀10年嘅供款期。假如你依家收入未必咁穩定，可以考慮較短嘅5年供款期，避免斷供危機。
- 「延期年金」由2019年推出至今已經第5年，如果之前已經投保咗而就嚟供完嘅話，其實可以買新一份適合自己規格嘅保單，當舊有年金計劃已回本並有需要調整現金流時，您亦可以考慮將舊嘅「延期年金」保單提早領取而作新一份保單供款都得㗎！
- 市面上嘅「延期年金」計劃有唔同嘅領取年金期，短至10年、15年、20年，甚或至到100歲。假如你買「延期年金」嘅目的係想有長期退休收入，就可以揀領取年金期較長嘅計劃。如果暫時想用嚟作為中期儲蓄，未至於用嚟作為退休長糧工具，咁10 – 20年年金期都足夠！
「延期年金」由2019年推出至今已經第5年，如果之前已經投保咗而就嚟供完嘅話，就要記得繼續買新一份適合自己規格嘅保單，您亦可以將舊嘅「延期年金」保單提早領取，再用嚟買新一份保單繼續扣稅都得㗎！
市面上嘅「延期年金」保單芸芸咁多款，種類繁多，作為消費者嘅我哋點樣揀選一份真正適合自己嘅保單呢？有「保險界消委會」之稱嘅10Life每年都會舉辦「5星保險大獎」，為全港超過1500款保險計劃進行分析，研究當中保障、條款等細節，最後甄選出市場唔同保險種類入面最高級嘅產品，並評為5星級別。最近公佈「5星保險大獎2024」名單中，Sun Life 永明、恒生保險、忠意保險、中銀人壽、中國太平洋人壽保險、中國太平及立橋人壽喺「扣稅年金類別獎項」都有產品獲得「5星扣稅年金獎」，當中Sun Life 永明嘅「豐碩延期年金計劃」更喺儲蓄、退休收入、對沖長壽風險各領域奪得獎項，突顯產品具全面性，而且保證和預期回報較理想。
自願醫保是甚麼？
為咗減輕公營醫療服務嘅壓力，食物及衞生局（現為醫務衞生局監管）喺2019年4月1日推出「自願醫保計劃」（Voluntary Health Insurance Scheme，簡稱VHIS ），讓保險公司同市民一同參與，目標提升個人償款住院保險產品嘅保障水平，並提供稅務優惠，鼓勵更多市民購買住院保險，從而選擇私營醫療服務，減低公營醫療服務壓力。
以往購買傳統醫療保險一直存在唔少弊病，唔同保險產品所提供嘅保障範圍、條款、保費等非常參差，而可扣稅「自願醫保」嘅出現用以規範住院保險，增強市民購買住院保險信心。
自願醫保特點
- 保證續保至100 歲（投保年齡介乎15日至80歲）
- 不設「終身保障限額」
- 特設21日冷靜期，期間可取消保單並全數取回已付保費
- 保障範圍包括投保前未知的已有疾病、先天性疾病治療、日間手術、訂明診斷成像檢測（如磁力共振掃描、電腦斷層掃描）、訂明非手術癌症治療（如化療、標靶、放射性治療）、精神科治療
- 保費支出可用作稅務扣減
自願醫保扣稅扣幾多？
「自願醫保」其中一大特點就係可以扣稅！不過扣稅方式同「延期年金」有唔同，並唔係課稅年度所需繳交稅項金額直接作扣減，而係每名投保人替自己／指明親屬（受保人）購買「自願醫保」計劃先有稅務扣除，扣稅額上限每年度可享HK8,000，扣稅保單數量及受保人亦不設上限。
合資格扣稅指明親屬包括：
- 納稅人配偶及子女
- 納稅人的祖父母、外祖父母、父母和兄弟姊妹
- 納稅人配偶的祖父母、外祖父母、父母和兄弟姊妹
自願醫保扣稅公式：自願醫保保費 x 稅率 = 扣稅金額
例如：「自願醫保」保費為HK8,000，用而家薪俸稅∕個人入息課稅嘅稅率表中最高稅率（即17%）計算，可以慳到HK$1,360稅款！
自願醫保扣稅例子計算
納稅人可為自己及親屬購買認可「自願醫保」產品保單，如果由家庭中交稅最多的成員負責幫助有需要嘅家人投保，就可更有效善用「自願醫保」嘅扣稅額，慳到更多稅款！
例子1：
假設您（即保單持有人）為自己及兩名子女（受保人）購買合共3份認可「自願醫保」保單，每份保單每年繳付保費金額為HK8,000，可獲年度扣稅額HK$8,000，假設稅率為17%，即每份保單慳HK$1,360，合共慳到HK$4,080稅款。
例子2：
| 受保人 | 每年繳付保費 | 可獲扣稅額 | 節省稅款
（稅率17%計算） |
| 自己 | HK$7,000 | HK$7,000 | HK$1,190 |
| 太太 | HK$7,000 | HK$7,000 | HK$1,190 |
| 父親 | HK$10,000 | HK$8,000 | HK$1,360 |
| 母親 | HK$10,000 | HK$8,000 | HK$1,360 |
假設您（即保單持有人）為自己、太太（配偶）、父親、母親（父母）購買合共4份認可「自願醫保」保單，即使部份保單所繳交保費金額超過扣稅上限嘅HK$8,000，都只能夠以上限HK$8,000作計算，所以從上表中顯示，4人家庭合共可慳到HK$5,100稅款。
自願醫保注意事項
只有「自願醫保」可享有扣稅優惠
市面上醫療保險產品眾多，只有「自願醫保」產品才可享有扣稅，其他醫保產品並未享有扣稅優惠。如果有興趣投保「自願醫保」的話，可以先到醫務衞生局嘅「自願醫保計劃」網站瀏覽獲認可保險公司「自願醫保」產品名單。
「自願醫保」分為標準／靈活計劃兩種
標準計劃係依照「自願醫保計劃」最低合規要求而設計嘅固定產品，屬於較基本實報實銷嘅醫保計劃；而靈活計劃喺產品設計方面更具彈性，保險公司會提供比標準計劃更全面嘅保障，包括更高的保障限額和更廣闊嘅保障範圍。
除咗扣稅之外，「自願醫保」目的係加強市民醫療保障，投保前不妨先比較市面不同「自願醫保」產品，根據自己需要，再因應自身及家庭狀況，選擇合適自己嘅「自願醫保」產品。如果會幫屋企人買埋嘅話，可以留意市面上一啲有保費回贈嘅「自願醫保」產品，扣稅之餘再慳得更多！
強積金可扣稅自願性供款是甚麼？
打工單靠人工5%作強積金（MPF）強制性供款，未必能夠得到充裕嘅退休保障。為鼓勵市民為退休作額外儲蓄，政府喺2019年4月1日推出「強積金可扣稅自願性供款」（TVC），以稅務寬減優惠吸引全港打工仔喺強積金計劃作額外供款。
強積金可扣稅自願性供款特點
- 可自行選擇強積金計劃開設「可扣稅自願性供款帳戶」，毋須經僱主安排開戶及扣除薪金作供款。
- 可選擇定期定額或一筆過供款
- 供款金額毋需與薪金掛勾
- 隨時轉移結餘至其他強積金計劃可扣稅自願性供款帳戶
- 提取條件與強制性供款相同
強積金可扣稅自願性供款扣稅扣幾多？
強積金自願性供款嘅扣稅上限為HK$60,000，而扣稅額會同「延期年金」共同合計，以現時最高稅率17%計算，每年最多可以節省$10,200稅款。
要留意嘅係，如果同時間為「強積金可扣稅自願性供款」及「延期年金」進行扣稅嘅話，扣稅額會先扣除「強積金可扣稅自願性供款」部份，餘額則用作扣減「延期年金」保費。
例子：
納稅人嘅「強積金可扣稅自願性供款」供款HK$40,000，並投保一份保費為HK$30,000嘅「延期年金」保單，以最高稅率17%計算，喺該年度合共可慳到HK$10,200稅款。
| 供款／保費 | 扣稅額 | 節省稅款
（稅率17%計算） |
| HK$40,000（TVC） | HK$40,000 | HK$6,800 |
| HK$30,000（延期年金） | HK$20,000 | HK$3,400 |
好唔好為咗扣税而投保？
「扣税三寶」當中嘅保險產品主要目的都係為咗保障大家嘅退休生活、財務同埋健康，而唔係為咗慳稅作主要目的，千祈唔好盲目為咗慳稅而投保「扣税三寶」，更加應該考慮自身財政情況作決定。如果有興趣投保，理應貨比三家，比較唔同保險公司，詳細了解各產品嘅內容及保費、投保人嘅權利、責任，以及保險公司服務等，再按自己需要及負擔能力選擇合適產品。
