【職場理財】|年金不是老人專利!後生仔女識得善用每年可慳高達HK$20,400!

好多人一聽到年金,就會聯想起電視廣告嗰個專屬老人家嘅理財產品。不過好多人都唔清楚延期年金(Qualifying Deferred Annuity Policy/QDAP)其實適合仍然工作中嘅打工仔,即使職場打滾一段時間嘅後生仔女都可以投保。除咗能夠為退休及早規劃外,「延期年金」最吸引嘅特點係可以「扣稅」,每年可慳稅最高$20,400

創造被動收入 兼享受稅務優惠!

「延期年金」係由香港政府推出嘅規劃退休工具,設立嘅目的係鼓勵市民盡早儲蓄迎接未來退休生活,投保人將累積嘅儲蓄資產,轉化做未來嘅穩定收入,並獲取每月保證年金入息,為未來生活自製長糧、提供更穩定被動收入,屬低風險嘅理財方式。追求高回報嘅話,更可以選擇較長年金滾存期,令年金供款滾存更高回報。

除咗為市民策劃退休添加保障之外,「延期年金」其中一個最大特點就係可以「扣稅」!由2019-2020課稅年度開始,納稅人可以就「延期年金」保費申請稅務扣除,扣除總額以每課稅年度HK$60,000為上限。按照而家薪俸稅/個人入息課稅嘅稅率表中最高稅率(即17%)計算,個人每年最多可慳到$10,200稅款。

如果你已經成家立室,夫婦各自擁有一份年金,更加可以合併報稅,靈活地分配扣稅額。假設夫婦二人都要交稅,丈夫嘅年金保費為 HK$90,000,妻子嘅年金保費為 HK$30,000,只要依兩份保單嘅年金領取人係夫妻任何一方或聯名,兩人都可各享 HK$60,000扣稅額,合共每年最多慳HK$20,400 稅款!

把握3月底扣稅最後機會

課稅年度會喺3月31日就會結束,打算即時享用扣稅優惠嘅話,就要限期前完成投保「延期年金」,並填寫IR831表格申請修訂評税,咁先可以係當前稅務年度獲得扣減。往後嘅保費繳付年期內,只要喺每年報稅時申請扣稅,就可以持續享有扣稅優惠。

除此之外,保險公司一般都會喺大家交稅前夕推出限時投保優惠,更有部份產品可享高達首年年度化保費20%保費回贈、保費假期、免醫療核保等迎新優惠,記得把握最後扣稅機會為自己退休「自製長糧」。選購「延期年金」緊記因應自身情況(如退休安排、風險接受程度)、投保目的、產品合適性、長期供款能力、流動資金需要等作考慮,從而揀選適合計劃。如果有任何投保「延期年金」疑問,可聯絡理財顧問會面,同您一齊策劃未來退休人生。