一年容易又交稅，打工仔們緊係想用盡免稅額令自己荷包「慳得一蚊得一蚊」。作為「扣稅三寶」之一嘅年金產品，近年深受打工仔關注。不過並非所有年金產品都能夠扣稅，亦有人質疑「年金係咪呃人」、「年金有伏」？以下會為一眾「投保新手」送上扣稅年金投保貼士，減輕大家財政負擔。
只有「延期年金 QDAP」享有扣稅優惠
香港嘅年金產品主要分為即期年金（Immediate Annuity）及延期年金（Qualifying Deferred Annuity Policy/QDAP）兩大類，即期年金沒有「累積期」及扣稅優惠，投保人一筆過繳付保費後，隨即每月領取現金收入，適合準備退休的人士，而政府轄下嘅香港按揭證券有限公司所牽頭嘅「香港年金計劃」就屬於即期年金。
至於延期年金（QDAP），具有「累積期」能夠滾存生息，投保人可選擇退休年齡先開始領取年金收入，適合仍然工作中嘅打工仔，就算打滾職場一段時間嘅後生仔女都可以投保。延期年金最大優點係可以「扣稅」，按照最高稅率（即17%）計算，最高可以慳稅HK$10,200，夫婦合併更可慳稅最高$20,400。
「延期年金」投保貼士
市場上「延期年金」產品五花八門，大部份產品都必須經過保險業監管局所認證，其銷售說明書及銷售文件中亦須清楚標示「QDAP合資格延期年金保單」標誌（見下圖）。
新手投保前，記得要留意下保單係咪經過官方認證。另外，市面上嘅「延期年金」計劃都有唔同特性，揀選適合自己嘅保單前不妨留意以下貼士，避免中伏。
1：投保年齡
「延期年金」保單均設最低及最高投保年齡，一般由18至65歲
2：最低繳付保費總額
「延期年金」保單應繳保費總額不少於HK$18萬
3：保費繳付期
「延期年金」最短保費繳付期為5年，部份計劃更提供10年選項，可因應個人財政能力作出選擇
4：年金領取期
「延期年金」領取期一般為10年或20年，部份計劃更設15年或至100歲
5：年金領取年齡
不同產品有不同的領取年金年齡，年金領取人必須年滿至少50歲或以上。
6：披露內部回報率（IRR）
內部回報率是將未來現金流量，分別為全期年金期保費的支出及收入，折現為相等現值的回報率，內部回報率愈高回報越大。內部回報率可分為「保證內部回部率」及「總內部回報率」，總內部回報率嘅計算包括非保證回報。
根據保險業監管局規定，銀行或保險公司在銷售「延期年金」保單時，於利益說明文件中必須披露個人化的「保證內部回報率」及「總內部回報率」。保單產品小冊子須透過以一名45歲非吸煙男性為例，顯示其內部回報率作參考，市場上有「延期年金」保單內部回報率可達每年4.05%。
7：早保證回本期
累積嘅年金入息相等於已繳保費總額，可視為「回本」，而所需嘅時間就係「回本期」。部份「延期年金」計劃回本期較短，例如保費繳付期為5年，回本期最早為第8年，若有突發意外時可及時提取應急，為保單主權人帶來更大彈性。
8：其他附加保障
部份「延期年金」產品設有免費及附加醫療、疾病、身故保障，即使年金受保人不幸身故，年金亦可為受益人提供身故保障。
把握3月底坐上「扣稅尾班車」
課稅年度會喺3月31日就會結束，銀行及保險公司會喺課稅年度結束後嘅40日內，向投保人提供保單年度摘要，並列出該年度已繳付嘅合資格保費金額。
打算即時享用扣稅優惠嘅話，就要限期前完成投保「延期年金」，並填寫稅務局IR831表格申請修訂評税，咁先可以係當前稅務年度獲得扣減。往後嘅保費繳付年期內，只要喺每年報稅時申請扣稅，就可以持續享有扣稅優惠。
除此之外，銀行及保險公司一般都會喺大家交稅前夕推出限時投保優惠，更有部份產品可享高達首年年度化保費20%保費回贈、保費假期、免醫療核保等迎新優惠，記得把握最後扣稅機會為自己退休「自製長糧」。
保險業監管局推出「年金至識揀」一站式搜尋工具，協助你更容易尋找出可供銷售的QDAP選項及其產品特性。選購「延期年金」緊記因應自身情況（如退休安排、風險接受程度）、投保目的、產品合適性、長期供款能力、流動資金需要等作考慮，從而揀選適合計劃。如果有任何投保「延期年金」疑問，可聯絡理財顧問會面，同您一齊策劃未來退休人生。
