疫情下，全球裁員潮不斷，同時就業率亦不斷下降。令唔少打工仔都趁機轉型，投身自由工作者（freelancer）行列。然而成為一位freelancer除咗需要擁有專業技能之外，其實亦需要具備多項特質；若然睇緊文嘅你想轉型做freelancer，但又心大心細。不如透過以下文章測試一下自己到底適唔適合freelance嘅工作模式啦。
必備特質一－自律主動
有別於一般嘅打工仔，freelance工作模式無一般打工仔收入咁穩定，即係意味着freelancer一定需要有自律同主動嘅工作態度。另外freelancer亦需要主動出擊經營同拓展自己嘅事業，例如學習多一門技能或參與唔同嘅社交活動，以幫助提升自己嘅工作質素同擴張專業領域。
必備特質二－時間管理
freelancer雖然自由，不過同時你亦可能要面對同時進行幾份工作，再加上freelance工作模式冇老闆或同事每天係身邊跟進你嘅工作，所以有良好嘅時間管理力能係freelancer應有嘅技能，如果自問自己係一位deadline fighter，咁freelance嘅工作模式就未必適合你啦。
必備特質三－獨立自主
freelancer經營嘅係一門個人生意，角色猶如老闆，不論係為自己「標價」、同客戶討價還價、甚至「追尾數」都要自己一手包辦，所以作為一名freelancer有獨立決策嘅能力係相當重要。
必備特質四－靈活變通
不同於office有規定嘅辦公時間以及工作流程，freelancer工作彈性更高。如有突發急事，亦唔使擔心「批假」嘅問題，工作安排變得非常靈活。不過此處嘅變通，當然唔止freelancer自身，同時亦要顧及客戶嘅便利，面對緊急嘅工作，freelancer就要識得點樣靈活按排工作以達能夠滿足顧客嘅需求。
必備特質五－了解自己市場嘅價值
若非已闖出名堂，否則推銷及售賣自己嘅專業才能就係freelancer嘅職責之一，因此善長溝通同擁有營銷技巧亦都係freelancer起步嘅重要基石。而作為freelancer你首先要了解到自己係市場上嘅價值，當議價時先可以堅定地同客戶解釋自己嘅價值。