香港地個個諗提早退休，唔通個個都真係有能力提早退休咩？呢頭賺錢嗰頭使錢，衣食住行乜都貴，仲話諗提早退休？相信呢個都係唔少打工仔嘅心聲，不過長遠啲諗，大家打拼一生努力儲錢，都係為咗過更好嘅日子，為未來實現理想嘅退休生活，但究竟要儲幾多，先能夠支持到未來退休生活呢？
香港退休開支要幾多？點為之7成退休收入？
香港財務策劃師學會喺上年6月發表《香港退休開支指數》2022調查，訪問了300名55至74歲並無領取社會福利的退休人士，顯示每月所需退休開支為HK$13,800，較2021年的HK$13,500微升HK$300。
經濟合作與發展組織（OECD）曾建議以「替代率」（replacement rate）達到7成作為港人計算退休後開支或入息嘅其中一個參考指標，「替代率」其實係指退休金相對在職時入息嘅比率，俾大眾了解退休前後收入嘅分別，去評估退休金係咪足以維持退休前嘅消費水平。
替代率計算：退休後收入（如年金、社會福利）÷ 退休前收入
例如：退休後收入係HK$21,000，退休前收入係HK$30,000，替代率就係70%，即係退休後收入能夠替代退休前收入7成。
公會表示，如果要維持退休前嘅生活水平，「建議替代率」就要達到7成，不過係今次調查亦都發現退休人士嘅收入比例唔理想，只有近3成受訪者能夠達到「建議替代率」（即收取退休前收入的7成）；有4成受訪者收入不及退休前嘅一半，結果反映退休人士需要壓低消費以迎合退休生活。
大家對退休生活都會有唔同嚮往，您有您多姿多采，我有我簡約平淡，最緊要都係認清楚自己退休需要啲乜。小編將會以衣食住行、旅行、醫療呢3大退休日常生活例子，同大家探討下究竟退休實際需要幾多開支啦！
有本地銀行委託澳洲退休基金協會（The Association of Superannuation Funds of Australia）進行一系列香港退休研究及分析，每季發表最新退休指標報告，讓大眾了解退休生活所涉及嘅每月預算開支金額。
衣食住行
根據該報告有關衣食住行（食物、房屋、水電煤、交通、服飾）的分析顯示，假設住喺公共房屋嘅65-79歲退休人士（單身人士），佢哋每月預算數字係HK$6,975，二人家庭每月預算數字係HK$12,010；80歲或以上嘅退休人士（單身人士），佢哋每月預算數字係HK$6,405，二人家庭每月預算數字係HK$10,800。
假設住喺私人物業（按揭已還清）嘅65-79歲退休人士（單身人士），按分析內「簡約生活」方式指標下，佢哋每月預算數字係HK$10,580，二人家庭每月預算數字係HK$15,965；80歲或以上嘅退休人士（單身人士），佢哋每月預算數字係HK$10,280，二人家庭每月預算數字係HK$15,030。
醫療
醫療都係一個退休之後經常要關心嘅範疇之一，按照上面提及過嘅報告有關醫療分析顯示，假設住喺公共房屋嘅65-79歲退休人士（單身人士），佢哋每月預算數字係HK$95，二人家庭每月預算數字係HK$200；80歲或以上嘅退休人士（單身人士），佢哋每月預算數字係HK$410，二人家庭每月預算數字係HK$855。
假設住喺私人物業（按揭已還清）嘅65-79歲退休人士（單身人士），按分析內「簡約生活」方式指標下，佢哋醫療每月預算數字係HK$285，二人家庭每月預算數字係HK$610；80歲或以上嘅退休人士（單身人士），佢哋每月預算數字係HK$1,225，二人家庭每月預算數字係HK$2,515。
旅行
大家喺未退休前，可能因為工作關係難啲去遠嘅地方旅行，之但係退休之後多咗空閒時間，無論短線遊抑或長線遊，定係打算嚟個環遊世界之旅，相信都係唔少退休人士夢寐以求。不過，每個人嘅旅行地點各不同，開支都不同，好難一概而論。
按照小編粗略估計，大部份退休人士都會選擇喺75歲前出發去旅行，例如短程到東南亞旅行嘅開支預算約每人HK$10,000元左右，長途遠赴歐美嘅開支預算約每人HK$30,000 – 50,000。假如您65歲開始退休，1年內去2次短途旅行、1次長途旅行，以10年的費用平均每年HK$70,000元及按照2023年11月CPI（消費者物價指數）2.6%計算，一人旅行大約需要71萬左右，二人同行的話大約需要143萬左右。
策劃退休最緊要計點條數
需要幾多錢先夠退休都係因人而異嘅，不過最重要都係及早規劃退休預算，並開始養成儲蓄習慣，咁先可以安享晚年，享受人生！市面上有部份保險公司提供免費工具俾市民參考退休後開支，例如Sun Life 永明嘅『退得「優」計算機』，只要用幾分鐘回答有關退休儲蓄、理財、MPF及預計退休生活開支等問題，就可以了解預期退休時所需要嘅資金、預期退休嗰陣可以儲到幾多錢、以及籌劃退休時需要考慮嘅重要因素。
以上退休工具能夠幫助您作出相應規劃，不過近年通脹上升，退休開支自然亦都上升，所以更重要就係確保自己未來有穩定嘅退休收入，揀選適合自己嘅退休理財產品可能係您嘅必備法寶，例如近年多人選擇兼且有得申請扣稅嘅「QDAP 延期年金」產品，從而可減低未來退休開支上升嘅潛在風險。
講到尾策劃理想退休生活前，儲蓄係非常重要一環，「QDAP 延期年金」能夠幫助打工仔建立定期嘅儲蓄習慣，喺累積期內定期供款達至積存生息，及後去到指定年期或年齡之後，可以每月領取年金收入，「自製長糧」創造穩定收入。大家所嚮往嘅退休生活都唔一樣，如果有需要了解更多您嘅退休大計點樣策劃得更好，不妨搵下專家傾下，同您一齊策劃美好人生下半場。
