自從WhatsApp宣布更新用戶服務條款，「辣㷫」咗一眾用戶之後，網絡上就掀起咗棄用WhatsApp嘅熱潮，紛紛轉用另一款有更高加密標準嘅即時通訊軟件 Signal 上，就連啱啱成為世界首富嘅Tesla CEO 馬斯克（Elon Musk ）係上星期四都呼籲大家改用Signal，咁到底 Signal 有咩值得大家轉用，今日就同大家一齊分析下啦！
其實功能上 Signal 同 WhatsApp 大家分別並唔大，一樣有groud chat、已讀功能等，send 片 send 錄音一樣無問題。不過最大嘅分別就係 Signal 係由非盈利組織而經營，軟件亦設有端對端加密功能，加上信息內容會透過伺服器分段傳輸，可以完美隱藏使用者嘅IP位址。至於加密機制，Signal 採用一次性密鑰，用戶嘅每一則訊息都會由唔同嘅金鑰加密，即係如果有人想破解都難以將所有信息破解出嚟，所以 Signal 能夠大幅降低訊息洩漏嘅風險，而且亦能夠提供高度保密功能。另外，Signal 更有Telegram 嘅閱後即焚功能，可以保障自己同其他人嘅私隱。
不過打工仔要留意嘅係，Signal 同其他通信軟件一樣需要用電話號碼登錄，但 Signal 就唔似 Telegram 一樣可以完全隱藏自己嘅電話號碼，所以如果你想建立一個不記名嘅講老細壞話群組，就唔太建議用 Signal 啦！不過諗返轉頭，Signal 咁做亦有好處，就可以令你用戶方便辨別真人防止有人假扮老細。
總結嚟講，Signal 功能方面同 WhatsApp 相似，雖然無 Telegram 隱藏電話功能，但比WhatsApp 有較多私隱保護功能，例如軟件密碼鎖、隱藏已讀功能同閱後即焚功能等。而且係加密功能上亦更嬴 WhatsApp 同 Telegram。
